STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU Id-Deputat Prim Ministru Borg jingħaqad mal-Ministri tal-Affarijiet[...]

Id-Deputat Prim Ministru Ian Borg ħa sehem f'laqgħa tal-Kunsill tal-Affarijiet Barranin tal-Unjoni Ewropea flimkien mal-Prim Ministru tal-Libanu Nawaf Salam, fejn tenna l-appoġġ ta' Malta lejn il-gvern u l-poplu Libaniż fl-isforzi tagħhom biex jibnu stabbiltà u sigurtà, minkejja li jinsabu involuti f'kunflitt li ma kienux huma li bdewh.

Id-diskussjoni bejn il-Ministri tal-Affarijiet Barranin tal-UE u l-Prim Ministru tal-Libanu saret waqt il-laqgħa t'April tal-Kunsill tal-Affarijiet Barranin tal-UE, it-Tlieta filgħodu, fil-Lussemburgu.

Filwaqt li laqa' b'sodisfazzjon il-waqfien temporanju mill-ġlied u n-negozjati li għaddejjin bejn Iżrael, il-Libanu u l-Istati Uniti, id-Deputat Prim Ministru u Ministru għall-Affarijiet Barranin u t-Turiżmu Malti wissa li "t-tbatijiet fuq ċivili innoċenti huma inaċċettabbli, hekk kif iċ-ċiklu ta' vjolenza ta' dan l-aħħar qed ipoġġi f'riskju l-progress fraġli li għamel il-Libanu f'dawn l-aħħar xhur, speċjalment fir-riformi li tant jeħtieġ."

Malta qed tkompli tappoġġja l-proċess biex terġa' tiġi rrestawrata l-awtorità sħiħa tal-Istat fil-Libanu, inkluż id-diżarm tal-Hezbollah u l-konsolidazzjoni tal-monopolju tal-Istat fuq l-użu tal-forza, f'konformità mar-Riżoluzzjoni 1701 tal-Kunsill tas-Sigurtà tan-Nazzjonijiet Magħquda (UNSCR 1701).

"Nisħqu dwar l-importanza ta' djalogu sinifikattiv bħala pass meħtieġ biex is-sitwazzjoni ma tibqax teskala," sostna Dr Borg, filwaqt li żied li "l-għażliet li se jsiru fiż-żmien li ġej se jiddeterminaw id-direzzjoni ta' din il-kriżi u s-sigurtà u l-istabbiltà tar-reġjun sħiħ."​

Huwa enfasizza wkoll il-ħtieġa li tiġi żgurata s-sigurezza u s-sigurtà tal-forzi taż-żamma tal-paċi, u esprima solidarjetà mal-UNIFIL, wara l-attakk fatali riċenti fin-Nofsinhar tal-Libanu.

Il-laqgħa tal-Kunsill tal-Affarijiet Barranin tal-UE tat-Tlieta ddiskutiet ukoll il-gwerra fl-Iran u l-aħħar żviluppi fl-Ukrajna, bil-parteċipazzjoni tal-Ministru għall-Affarijiet Barranin Ukren Andrii Sybiha.

Hekk kif enfasizza l-ħtieġa li tkompli tiżdied il-pressjoni fuq ir-Russja biex ittemm il-gwerra ta' aggressjoni tagħha, Dr Borg appella għal soluzzjonijiet rapidi biex jitneħħew l-ostakli għall-inizjattivi tal-UE b'appoġġ għall-Ukrajna u l-poplu tagħha, inkluż il-Ukraine Support Loan, kif ukoll il-proċess ta' tkabbir tal-Unjoni. Huwa faħħar ukoll l-għajnuna tal-UE kontra theddid ċibernetiku u ibridu, biex jiġu mħarsa l-proċessi demokratiċi tal-Ukrajna u tiġi żgurata s-sigurtà dejjiema.

Fil-kummenti tiegħu dwar is-sitwazzjoni fl-Istrett ta' Hormuz, id-Deputat Prim Ministru Malti appella għal iżjed impenn diplomatiku biex tiġi mħarsa s-sigurtà marittima u l-libertà tan-navigazzjoni.

"Nilqgħu d-deċiżjoni tal-imsieħba tagħna fil-Golf, li għażlu reazzjoni multilaterali bilanċjata minflok azzjoni unilaterali bbażata fuq il-forza," hu qal, hekk kif spjega li "permezz tal-appoġġ tagħha lir-Riżoluzzjoni 2817 tal-Kunsill tas-Sigurtà (UNSCR 2817), lid-Dikjarazzjoni tal-Kunsill tal-Organizzazzjoni Marittima Internazzjonali u lir-Riżoluzzjoni tal-Kunsill tad-Drittijiet tal-Bniedem f'Ġinevra, Malta kompliet issostni d-determinazzjoni soda tagħna li nappoġġjaw lill-pajjiżi tal-Golf quddiem l-attakki indiskriminati fuq iċ-ċivili, l-infrastruttura u l-ekonomiji tagħhom."