2026 ОНЫ 1 САРЫН НИЙГЭМ, ЭДИЙН ЗАСГИЙН ТАНИЛЦУУЛГА ГАРЛАА

Халдварт өвчнөөр 73 хүн өвчилж бүртгэгдсэн нь өмнөх оны мөн үеэс 28 (62.2%) тохиолдлоор өссөн байна. Халдварт өвчнөөр өвчлөгчдийг өвчний төрлөөр авч үзвэл 43 (58.9%) хүн бэлгийн замын халдварт өвчин, 6 (8.2%) хүн салхин цэцэг өвчин, 12 (16.4%) хүн сүрьеэ өвчин, 2 (2.8%) хүн цусан суулга, 10 (13.7%) хүн бусад халдварт өвчин, харин гепатит халдварт өвчин бүртгэгдээгүй байна. Хүйсээр авч үзвэл халдварт өвчнөөр 73 хүн өвчилсний 44 (60.3%), бэлгийн замын халдварт өвчний 28 (65.1%), салхин цэцэг өвчний 3 (50.0%), сүрьеэ өвчний 6 (50.0%), цусан суулга 2 (100.0%), бусад халдварт өвчний 5 (50.0%) нь эмэгтэйчүүд өвчилсөн байна. 2026 оны 1 дүгээр сарын байдлаар нийт 83 эх амаржиж, 84 хүүхэд төрүүлсэн нь өмнөх оны мөн үеэс амаржсан эх 6 (6.7%)-аар, төрсөн хүүхэд 5 (5.6%)-аар тус тус буурсан байна. Төрөлтийг насны бүтцээр нь харахад 25-29 насны 20 (24.1%), 30-34 насны 26 (31.3%), 35-39 насны 12 (14.5%), 20-24 насны 17 (20.5%), 40-44 насны 6 (7.2%), 20 хүртэлх насны 2 (2.4%) эх тус тус эзэлж байна. Төрсөн хүүхдийн 43 (51.2%) нь эрэгтэй, 41 (48.8%) нь эмэгтэй хүүхэд байна.

2026 оны 1 дүгээр сарын байдлаар 0-1 хүртэлх насны хүүхдийн эндэгдэл 1 гарч, 1-5 хүртэлх насны эндэгдэл гараагүй байна. Өмнөх оны мөн үетэй харьцуулахад 0-1 хүртэлх насны эндэгдэл 1 (50.0%)-ээр буурсан байна.

Нас барсан хүний тоо 53 байна. Нас барагсдын 34 (64.2%) нь эрэгтэйчүүд, 19 (35.8%) нь эмэгтэйчүүд байна. Нийт нас баралтыг шалтгаанаар авч үзвэл 16 (30.2%) нь зүрх судасны тогтолцооны өвчин, 10 (18.9%) нь хорт хавдар, 17 (32.1%) нь осол гэмтэл, 3 (5.7%) нь хоол боловсруулах тогтолцооны, 4 (7.5%) нь амьсгалын тогтолцооны, 3 (5.6%) нь бусад өвчин эзэлж байна.

Сэлэнгэ аймгийн хэмжээнд аймгийн нэгдсэн эмнэлэгт 54 хүн эрэгтэйчүүдийн кабинетаар үйлчлүүлсэн байна. Энэхүү үзүүлэлт нь өнгөрсөн оны мөн үетэй харьцуулахад 11 (16.9%) хүнээр буурсан байна.

Хувийн хэвшлийн эрүүл мэндийн байгууллагууд 2.2 мянган хүнд үйлчилж, үйлчилгээний хөлс 1664.9 сая төгрөг болжээ.