Shqipëria 17 vjet në NATO, Nufi: Të ndihemi krenarë për çfarë kemi arritur këto vite

Forcat e Armatosura të Shqipërisë festuan sot 17-vjetorin e anëtarësimit të Shqipërisë në NATO. Në ceremoninë e zhvilluar në Garnizonin e Forcës Tokësore në Zall Herr, morën pjesë ministri i Mbrojtjes, z. Ermal Nufi, zëvendësministrat Enkelejd Joti dhe Blerina Abrazhda, shefi i Shtabit të Përgjithshëm të FA, gjenerallejtënant Arben Kingji, deputetë të Kuvendit si dhe ushtarakëve të të gjitha gradave.

Ministri i Mbrojtjes, z. Ermal Nufi, vlerësoi arritjet e Shqipërisë në këto 17 vite si vend anëtar i Aleancës, duke veçuar rolin e burrave dhe grave në uniformë: "Shqipëria duhet të ndihet krenare për gjithçka kemi ndërtuar në këto 17 vite. Krenarë për besimin që kemi fituar dhe për profesionalizmin e grave dhe burrave në uniformë, që përfaqësojnë Shqipërinë me dinjitet në çdo mision. Një faktor stabiliteti në rajon, gjithmonë krah aleatëve, Shqipëria ka zgjedhur të ecë me hapin e NATO-s," - u shpreh ministri Nufi.

Nga ana e tij, shefi i Shtabit të Përgjithshëm, gjenerallejtënant Arben Kingji, theksoi rëndësinë historike të anëtarësimit dhe rolin aktiv të vendit në Aleancë: "Sot shënojmë 17-vjetorin e anëtarësimit të Shqipërisë në NATO. Që nga ky moment historik, Shqipëria ka dëshmuar përkushtim të palëkundur ndaj vlerave të Aleancës, duke u shndërruar në një kontribuese aktive në misionet dhe operacionet e përbashkëta. Në këtë rrugëtim, shpreh mirënjohje të veçantë për aleatët dhe partnerët tanë për bashkëpunimin dhe mbështetjen në rritjen e kapaciteteve operacionale të Forcave të Armatosura, në funksion të përmbushjes së detyrimeve tona kombëtare dhe ndërkombëtare", - deklaroi ai.

Në përfundim, ministri Nufi dhe deputetët e Komisionit të Sigurisë panë nga afër mjetet dhe pajisjet e ekspozuara për këtë rast, si dhe u informuan për kapacitetet dhe gatishmërinë e tyre.

Ceremonia në Garnizonin e Zall Herrit rikonfirmoi angazhimin e Shqipërisë për të vijuar kontributin aktiv në kuadër të NATO-s, duke forcuar më tej rolin e saj si faktor stabiliteti dhe sigurie në rajon dhe më gjerë.