Ministri Salla në Roskovec: LIS, informacion falas për tokën dhe më pak kosto për fermerët

Ministri i Bujqësisë dhe Zhvillimit Rural, Andis Salla, prezantoi në Roskovec aplikacionin e ri LIS, Sistemi i Informacionit të Tokës, i cili u mundëson fermerëve të aksesojnë drejtpërdrejt nga telefoni dhe pa pagesë informacion mbi karakteristikat dhe nevojat e tokës së tyre.

Gjatë vizitës në Roskovec, në plantacionin me 7 dynym shegë të fermerit Agron Gega, Ministri Salla tregoi konkretisht mënyrën se si fermerët mund ta përdorin sistemin për të marrë informacionin e nevojshëm për tokën, kultivimin dhe përdorimin më efikas të plehrave dhe inputeve bujqësore.

"Sot, falë aplikacionit dhe sistemit që kemi ndërtuar, kemi digjitalizuar dhe hedhur në sistem të dhënat e tokës bujqësore, në mënyrë që fermerët t'i aksesojnë dhe ta marrin të gjithë informacionin përmes telefonit", u shpreh Salla.

LIS synon të ndihmojë fermerët të shmangin shpenzimet e panevojshme dhe të ulin kostot e prodhimit, duke përdorur në mënyrë më efikase inputet bujqësore, si dhe të krijojë kushtet për përmirësimin e rendimentit dhe cilësisë së prodhimit.

Ministri Salla u bëri thirrje fermerëve të përdorin sistemin përmes QTTB-ve, duke e cilësuar atë një instrument praktik që e sjell informacionin për tokën bujqësore drejtpërdrejt në duart e fermerit.

"I bëj thirrje të gjithë fermerëve të kenë akses në Sistemin e Informacionit të Tokës, nëpërmjet QTTB-së, për të pasur informacionin e duhur për tokën bujqësore dhe analizat e saj", përfundoi Salla.