Sekretari i Përgjithshëm i MEPJ-së, Armand Skapi, merr pjesë në Forumin Vjetor të AII dhe EUSAIR

Sekretari i Përgjithshëm i Ministrisë për Evropën dhe Punët e Jashtme të Republikës së Shqipërisë, Armand Skapi, mori pjesë në Forumin Vjetor të Iniciativës Adriatiko-Joniane (AII) dhe të Strategjisë së Bashkimit Evropian për Rajonin Adriatiko-Jonian (EUSAIR), i zhvilluar nën Kryesinë e Maqedonisë së Veriut. Në fjalën e tij, ai shprehu vlerësimin për organizimin dhe përmbylljen me sukses të Kryesisë së Maqedonisë së Veriut.

Gjatë ndërhyrjes së tij, z. Skapi vlerësoi rolin e bashkëpunimit ndërmjet vendeve të rajonit dhe Bashkimit Evropian, duke nënvizuar se integrimi evropian i Ballkanit Perëndimor, Ukrainës dhe Moldavisë mbetet një prioritet strategjik. Ai theksoi gjithashtu nevojën për vijimin e reformave dhe ruajtjen e momentit pozitiv në procesin e zgjerimit të Bashkimit Evropian.

Në fjalim u nënvizua se Shqipëria rikonfirmon angazhimin e saj për respektimin e së drejtës ndërkombëtare dhe dënon agresionin rus ndaj Ukrainës. Po ashtu, u evidentua rëndësia e Planit të Rritjes dhe Agjendës së Reformave, si dhe e investimeve në transformimin digjital, energji dhe punësim.

Skapi vlerësoi rolin e EUSAIR si një platformë kyçe për forcimin e bashkëpunimit rajonal dhe afrimin e vendeve aspirante me politikat dhe standardet e Bashkimit Evropian. Ai theksoi gjithashtu rëndësinë e përfshirjes së të rinjve përmes Këshillit Rinor të EUSAIR.

Në përfundim, Sekretari i Përgjithshëm theksoi synimin e Shqipërisë për të përmbyllur negociatat e anëtarësimit deri në vitin 2027 dhe për të arritur anëtarësimin e plotë në Bashkimin Evropian deri në vitin 2030.