A Domus incorporará catro novos módulos interactivos sobre Intelixencia Artificial na súa exposición permanente

A Domus prepara unha importante renovación da súa exposición permanente coa instalación de catro novos módulos interactivos dedicados á Intelixencia Artificial (IA). Esta actuación forma parte do proxecto "Viaxe ao Centro da Intelixencia Artificial", que busca achegar á cidadanía os principios, aplicacións e retos éticos desta tecnoloxía chamada a transformar a sociedade.

"A renovación e actualización dos Museos Científicos é unha das premisas que nos encargou a nosa alcaldesa, Inés Rey, co obxectivo de que A Coruña siga sendo referente na divulgación de coñecementos", indicou Gonzalo Castro, concelleiro de Cultura e Turismo. Os novos módulos estarán distribuídos en diferentes áreas temáticas da Domus, integrándose na narrativa expositiva existente: xenética, nutrición e Obxectivos de Desenvolvemento Sustentable (ODS), neurociencia e a propia imaxe.

Cada módulo combinará contidos científicos rigorosos con experiencias interactivas, permitindo ao público experimentar como a IA actúa como ferramenta de apoio en ámbitos como a saúde, a investigación ou a creatividade. Ademais, todos incluirán un apartado específico sobre "AI for Good", que destacará o uso responsable e socialmente beneficioso da intelixencia artificial.

O proxecto, impulsado polo Concello, responde á misión educativa da Domus e ás tendencias internacionais en museoloxía científica, apostando por experiencias participativas, multisensoriais e orientadas ao pensamento crítico.

A instalación dos módulos conta cun orzamento global de 79.881,48 euros, financiado con fondos propios e unha achega da Fundación Española para a Ciencia e a Tecnoloxía (FECYT). Con esta iniciativa, a Domus reforza o seu papel como espazo de divulgación científica e tecnolóxica, convidando á reflexión sobre o impacto da IA na vida cotiá e na construción dun futuro máis xusto e sostible.