Ministri Nufi takon në Pentagon Nënsekretarin amerikan të Luftës për Politikat, Elbridge A. Colby

Ministri Nufi takon në Pentagon Nënsekretarin amerikan të Luftës për Politikat, Elbridge A. Colby

Ministri i Mbrojtjes, z.Ermal Nufi zhvilloi një takim në Pentagon me nënsekretarin amerikan të Luftës për Politikat, Elbridge A. Colby. Në fokus të bisedimeve ishin situata e sigurisë në hapësirën euro-atlantike dhe forcimi i bashkëpunimit strategjik mes Shqipërisë dhe Shteteve të Bashkuara.

Pas takimit, ministri Nufi vlerësoi bisedën e zhvilluar me zyrtarin e lartë amerikan, duke theksuar rëndësinë e koordinimit të ngushtë mes aleatëve përballë sfidave të reja që po ndikojnë mjedisin e sigurisë ndërkombëtare.

Sipas ministrit të Mbrojtjes z.Ermal Nufi, partneriteti mes Shqipërisë dhe SHBA-së mbështetet mbi vlera të përbashkëta, besim të ndërsjellë dhe angazhim të qëndrueshëm për paqen, stabilitetin dhe mbrojtjen kolektive. Ai nënvizoi se, në kushtet e një mjedisi sigurie gjithnjë e më kompleks, bashkërendimi i veprimeve mes vendeve aleate mbetet një element kyç për mbrojtjen e interesave të përbashkëta dhe forcimin e sigurisë transatlantike.

"Shqipëria vlerëson thellësisht lidershipin dhe mbështetjen e vazhdueshme të Shteteve të Bashkuara dhe mbetet e përkushtuar ndaj përgjegjësive të saj si një aleate e besueshme në NATO, duke kontribuar për një Aleancë më të fortë, më të sigurt dhe më kompakte", - shprehet ministri Nufi në reagimin e tij, pas takimit.

Takimi në Pentagon u zhvillua në kuadër të vizitës zyrtare të ministrit të Mbrojtjes në SHBA dhe konfirmon nivelin e lartë të marrëdhënieve mes dy vendeve, si dhe angazhimin e përbashkët për forcimin e sigurisë dhe stabilitetit në rajonin euro-atlantik.