АЮУЛГҮЙ ОРЧНЫ ТӨЛӨӨ ХАМТДАА ХАРИУЦЛАГА ХҮЛЭЭЖ, ХАМТДАА УРЬДЧИЛАН СЭРГИЙЛЬЕ

Иргэдийн амар тайван, аюулгүй орчинд ажиллаж, амьдрах эрхийг хангах нь төр, байгууллага, иргэн бүрийн хамтын үүрэг юм. Гэмт хэрэг, зөрчил, гал түймэр, үйлдвэрлэлийн осол, байгалийн гамшиг зэрэг эрсдэлийг бууруулах хамгийн үр дүнтэй арга бол урьдчилан сэргийлэх үйл ажиллагаа, иргэдийн идэвхтэй оролцоо юм.

Иргэн бүр өдөр тутмын амьдралдаа хууль, дүрмийг сахиж, эрсдэлтэй нөхцөл байдлыг үл хайхралгүй анхаарч, шаардлагатай тохиолдолд холбогдох байгууллагад цаг алдалгүй мэдээлэх нь гэмт хэрэг, осол, аюулын хор уршгийг бууруулах чухал ач холбогдолтой.

Олон нийтийн газар сэжигтэй хүн, эд зүйл, хууль бус үйлдэл, нийтийн аюулгүй байдалд эрсдэл учруулж болзошгүй нөхцөл байдлыг анзаарсан бол өөрийгөө эрсдэлд оруулахгүйгээр мэргэжлийн байгууллагад нэн даруй мэдээлэх хэрэгтэй. Мөн цахилгааны гэмтэл, галын аюул, эвдэрч гэмтсэн барилга байгууламж, ил задгай нүх шуудуу зэрэг орчны эрсдэлийг мэдээлснээр бусдын амь нас, эрүүл мэндийг хамгаалахад үнэтэй хувь нэмэр оруулдаг.

Эцэг эх, асран хамгаалагчид хүүхдэдээ аюулгүй байдлын мэдлэг, цахим орчны зөв хэрэглээ, танихгүй хүнтэй харилцах эрсдэлийн талаар тогтмол зөвлөгөө өгч, хараа хяналтаа сайжруулах нь хүүхэд гэмт хэрэг, зөрчлийн хохирогч болохоос урьдчилан сэргийлэх чухал нөхцөл юм.

Мөн иргэн бүр анхан шатны тусламжийн мэдлэгтэй байх, гамшиг, ослын үед баримтлах арга хэмжээг мэддэг байх, өрхийн бэлэн байдлаа хангах нь аливаа эрсдэлийн үед өөрийгөө болон бусдыг хамгаалах боломжийг нэмэгдүүлдэг.

Аюулгүй нийгмийг зөвхөн хууль сахиулах байгууллага дангаараа бүрдүүлдэггүй. Харин иргэн бүрийн хариуцлагатай оролцоо, сонор сэрэмж, хууль дээдлэх ухамсар, хамтын ажиллагаа нь гэмт хэрэг, зөрчил, ослоос урьдчилан сэргийлэх хамгийн хүчирхэг хамгаалалт юм.

Аюулгүй орчны төлөө хамтдаа хариуцлага хүлээж, хамтдаа урьдчилан сэргийлье.

Эх сурвалж: https://cccp.gov.mn/contentm/487