Ministri Vengu në Forumin e Sigurisë së Varshavës: Rrisim bashkëpunimin me Poloninë dhe aleatët për mbrojtjen dhe industrinë ushtarake

Ministri Vengu në Forumin e Sigurisë së Varshavës: Rrisim bashkëpunimin me Poloninë dhe aleatët për mbrojtjen dhe industrinë ushtarake

Ministri i Mbrojtjes Pirro Vengu zhvilloi një vizitë zyrtare në Poloni, ku mori pjesë në Forumin e Sigurisë së Varshavës, ku dhe pati konsultime dypalëshe me homologun e tij polak Władysław Kosiniak-Kamysz.

[Link]

Gjatë takimit me ministrin e Mbrojtjes të Polonisë, u vendosën piketat e bashkëpunimit në fushën e industrisë ushtarake dhe të fuqizimit të kapitalit njerëzor mes dy forcave të armatosura. Ministri Vengu vlerësoi përvojën e Polonisë, e cila siç ai theksoi, ka ditur të ndërthurë me sukses anëtarësimin në Bashkimin Evropian me zhvillimin e industrisë së mbrojtjes si një shtyllë ekonomike, duke theksuar se këto praktika të mira do të shërbejnë edhe për Shqipërinë në rritjen e kapaciteteve të saj ushtarake.

[Link]

Në Forumin e Sigurisë, një nga formatet më të rëndësishme evropiane të bashkëpunimit mes vendeve të NATO-s, BE-së dhe industrisë së mbrojtjes, këtë vit u vu theksi te mbrojtja kibernetike. Ministri Vengu theksoi se Shqipëria ka arritur përparime domethënëse në këtë fushë, duke u renditur së fundmi ndër 50 vendet kryesore në botë për kapacitete të mbrojtjes kibernetike, civile dhe ushtarake.

Ai njoftoi gjithashtu se shumë shpejt një format i ngjashëm do të organizohet edhe në Shqipëri, falë bashkëpunimit me aleatët polakë, gjermanë dhe amerikanë, duke theksuar se përpjekjet e vendit në fushën e mbrojtjes, industrisë ushtarake dhe sigurisë kibernetike do të marrin një rol të veçantë në politikën e bashkëpunimit rajonal, veçanërisht në Evropën Juglindore.