STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU Il-Ġermanja ġġedded ftehim biex tkompli tappoġġja lill-MEDAC fl-istudji[...]

L-Akkademja Mediterranja tal-Istudji Diplomatiċi (MEDAC), fi ħdan l-Università ta' Malta, u l-Uffiċċju Federali għall-Affarijiet Barranin tal-Ġermanja qablu li jġeddu ftehim li ilu fis-seħħ għal ħafna snin, għal Appoġġ mill-Ġermanja fl-istudji dwar il-Paċi u l-Prevenzjoni tal-Kunflitti, fi ħdan l-istess Akkademja.​​

Il-ftehim ġie ffirmat mill-Ambaxxatriċi tar-Repubblika Federali tal-Ġermanja għal Malta, Tanja Beyer, u mill-President Emeritu u Chairman tal-MEDAC, George Vella, fil-preżenza tad-Deputat Prim Ministru u Ministru għall-Affarijiet Barranin u t-Turiżmu Ian Borg nhar il-Ġimgħa 19 ta' Diċembru 2025.

L-Appoġġ Ġermaniż tal-MEDAC fl-Istudji dwar il-Paċi u l-Prevenzjoni tal-Kunflitti ġie stabbilit fl-2009 b'rikonoxximent tal-importanza li tissaħħaħ il-kooperazzjoni Ewro-Mediterranja. Il-letturi li taw il-kontribut tagħhom permezz ta' dan l-appoġġ matul is-snin kienu responsabbli minn korsijiet post-gradwatorji lill-istudenti tal-MEDAC fl-istudji dwar is-sigurtà, flimkien ma' diversi attivitajiet akkademiċi oħra fi ħdan l-istess Akkademja.

Id-Deputat Prim Ministru Ian Borg irringrazzja lill-Ġermanja talli sostniet il-kontribut kruċjali tagħha lill-MEDAC tul l-aħħar 16-il sena. "Fi żminijiet ta' sfidi ġeopolitiċi u soċjali globali u reġjonali bla preċedent, ir-rwol ta' diplomatiċi mħarrġa tajjeb u bi prinċipji sodi sabiex jixprunaw id-djalogu u l-kooperazzjoni internazzjonali huwa aktar importanti minn qatt qabel. F'dan ir-rigward, se nkomplu ngħinu lill-MEDAC fis-snin li ġejjin, bħala parti mill-impenn komuni tagħna lejn l-edukazzjoni u l-emanċipazzjoni taż-żgħażagħ bħala s-sisien tal-paċi, it-tolleranza u l-ġustizzja," qal Dr Borg.

L-Ambaxxatriċi Beyer żiedet li "l-edukazzjoni għandha wkoll irwol kbir fl-aġenda tal-'Patt għall-Mediterran' li nediet il-Kummissjoni Ewropea f'Ottubru. Bħal Malta, il-Ġermanja temmen li fir-relazzjonijiet internazzjonali, id-diplomazija għandha ssaltan, u mhux il-kunflitt u l-gwerra. Huwa għalhekk li ż-żewġ pajjiżi qed inkomplu nappoġġjaw lill-MEDAC. L-Appoġġ Ġermaniż għall-Istudji dwar il-Paċi u l-Prevenzjoni tal-Kunflitti huwa l-aktar element ewlieni tal-kooperazzjoni bilaterali tagħna."

Il-Professur Stephen Calleya, Direttur tal-MEDAC, irringrazzja lill-Gvern Ġermaniż għall-għajnuna imprezzabbli tiegħu lill-MEDAC u enfasizza li l-Appoġġ Ġermaniż fl-Istudji dwar il-Paċi u l-Prevenzjoni tal-Kunflitti ilu pilastru ewlieni fl-attivitajiet akkademiċi tal-MEDAC sa mill-2009.​

Uffiċjali oħra mill-Ambaxxata Ġermaniża f'Malta u mill-Ministeru għall-Affarijiet Barranin u t-Turiżmu wkoll kienu preżenti waqt l-iffirmar tal-ftehim.

Il-MEDAC ġie stabbilit fi ħdan l-Università ta' Malta fl-1990, bil-għan li jipprovdi studji post-gradwatorji għal diplomatiċi żgħażagħ kif ukoll għal studenti li qed ifittxu karriera internazzjonali fid-diplomazija, f'organizzazzjonijiet internazzjonali u mhux governattivi, jew fis-settur privat. Minn dak iż-żmien 'l hawn, il-MEDAC baqa' jirċievi appoġġ finanzjarju u loġistiku mill-Ministeru għall-Affarijiet Barranin ta' Malta, mill-Università ta' Malta u minn imsieħba internazzjonali oħra.

​