STQARRIJA MILL-MINISTERU GĦAT-TRASPORT, L-INFRASTRUTTURA U X-XOGĦLIJIET PUBBLIĊI Jitħabbru żewġ proġetti ġodda fil-qalba ta’ Raħal Ġdid b’tisbiħ fil-pjazza prinċipali u dawl[...]

Il-Ministru għat-Trasport, l-Infrastruttura u x-Xogħlijiet Pubbliċi Chris Bonett ħabbar żewġ proġetti ġodda fil-qalba ta' Raħal Ġdid. Dawn il-proġetti huma parti minn viżjoni usa' ta' riġenerazzjoni u investiment f'din il-lokalità u se jinkludu t-tisbiħ tal-pjazza prinċipali kif ukoll sistema ġdida u moderna ta' dawl għall-Bażilika ta' Kristu Re.

Ix-xogħlijiet li diġà għaddejjin fil-pjazza prinċipali, jinkludu monument ġdid tal-Gran Mastru Antoine de Paule flimkien ma' plakka kommemorattiva fil-paviment li tfakkar l-400 sena mit-twaqqif ta' din il-lokalità u mapep tal-bronż li jissimbolizzaw l-iżvilupp ta' Raħal Ġdid matul is-snin. Barra minn hekk, ser jiġu restawrati l-funtani eżistenti u miżjuda elementi ġodda bħal siġar fi planters u bankijiet, biex il-pjazza tibqa' spazju ħaj għar-residenti u l-viżitaturi. Ix-xogħol fuq dan il-proġett diġà beda u miexi b'ritmu mgħaġġel.

Fl-istess waqt, id-Dipartiment tax-Xogħlijiet Pubbliċi ser ikun qed joħroġ it-tender għal sistema ġdida ta' dawl għall-Bażilika ta' Kristu Re. Is-sistema ser tkun qed teżalta l-arkitettura tal-faċċati u l-koppla filwaqt li ttejjeb il-viżibbiltà minn diversi lokalitajiet. Is-sistema se tinkludi kontroll individwali tad-dawl b'għażliet differenti, inkluż dimming u xeni varji, li jistgħu jiġu kkontrollati permezz ta' tablet. Dan jippermetti flessibbiltà skont l-okkażjoni, mill-użu ta' kuljum kif ukoll għal festi u attivitajiet speċjali. Il-proġett tad-dawl huwa mistenni jieħu madwar 7 xhur biex jitlesta minn meta jibda x-xogħol, wara li jingħalaq il-proċess tat-tender.

Il-Ministru Chris Bonett qal li dawn il-proġetti ma jiġux f'iżolament, iżda huma kontinwazzjoni tax-xogħol estensiv li sar tul l-aħħar snin minn diversi entitajiet tal-istess Minist​eru. Fosthom hemm il-Ġnien Tony Bezzina, li diġà qed jitgawda mir-residenti, kif ukoll ix-xogħlijiet li għaddejjin bħalissa fuq Ġnien Pawlu Boffa u Ġnien Silvio Parnis, flimkien ma' diversi xogħol infrastrutturali f'toroq u bankini ġodda. Il-Ministru Bonett spjega kif, "Dawn iż-żewġ proġetti flimkien jammontaw għal investiment totali ta' aktar minn €1 miljun li flimkien max-xogħol li għaddej bħalissa f'diversi żoni ta' Raħal Ġdid, se jkomplu jagħtu l-importanza u d-dinjità li jixraqlu dan ir-raħal, il-Pawlisti u dawk kollha li jżuruh."

Min-naħa tiegħu, is-Sindku ta' Raħal Ġdid Jason Silvio rringrazzja lill-Ministeru għat-Trasport, l-Infrastruttura u x-Xogħlijiet Pubbliċi għax-xogħol li qiegħed isir f'Raħal Ġdid. Huwa spjega li l-proġett tal-pjazza se jkun qed isebbaħ din iż-żona popolari u jkompli jibni fuq il-proġetti li għaddejjin madwar ir-raħal kollu.