STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU Id-Deputat Prim Ministru Ian Borg jiltaqa’ mas-Segretarju tal-Affarijiet[...]

Id-Deputat Prim Ministru u l-Ministru għall-Affarijiet Barranin u t-Turiżmu Ian Borg iltaqa' ma' Rt Hon Yvette Cooper, is-Segretarju tal-Istat għall-Affarijiet Barranin, tal-Commonwealth u tal-Iżvilupp tar-Renju Unit, sabiex jiddiskutu r-relazzjonijiet bilaterali u l-iżviluppi internazzjonali ta' interess komuni.

Dr Borg tenna l-importanza tal-ħbiberija fit-tul u tar-relazzjonijiet bilaterali b'saħħithom bejn iż-żewġ Nazzjonijiet, imsaħħa minn rabtiet storiċi, kulturali u familjari profondi. Huwa saħaq li "r-Renju Unit jibqa' pajjiż kruċjali għall-politika internazzjonali ta' Malta u għar-relazzjonijiet bilaterali tagħha, b'mod partikolari f'oqsma bħall-kummerċ, is-saħħa, is-sigurtà u oħrajn."

Il-kwistjonijiet reġjonali kienu wkoll fuq quddiem nett tal-aġenda, fosthom is-sitwazzjoni fl-Ukrajna, il-proċess ta' paċi fil-Lvant Nofsani, u l-qagħda fil-Libja. Dr Borg tenna l-impenn ta' Malta fil-promozzjoni tad-djalogu u l-paċi fil-Lvant Nofsani u fakkar fir-rikonoxximent ta' Malta tal-Istat Palestinjan f' Settembru li għadda, bħala parti mill-appoġġ kostanti tagħha għal soluzzjoni ta' żewġ stati. Dr Borg afferma wkoll l-appoġġ kontinwu ta' Malta għas-sovranità tal-Ukrajna u għall-ħtieġa li tintrefa' responsabbiltà.

"Ġewwa Londra ltqajt mas-Segretarju għall-Affarijiet Barranin Cooper fejn iddiskutejna numru ta' temi - b'mod partikolari l-Ukrajna, il-qagħda fil-Lvant Nofsani u r-rikonoxximent ta' Malta tal-Istat tal-Palestina, kif ukoll l-isforzi komuni tagħna biex inkomplu nżommu l-paċi u niżguraw sitwazzjoni fejn iż-żewġ stati, l-Iżrael u l-Palestina, jgħixu ħdejn xulxin fis-sigurtà u b'rispett reċiproku," qal Dr Borg.

Iż-żewġ Ministri enfasizzaw ukoll l-importanza li tibqa' tingħata l-attenzjoni lill-Libja kif ukoll ir-reġjun tal-Mediterran, li huma ta' importanza strateġika kemm għal Malta kif ukoll għall- Ewropa.

Id-Deputat Prim Ministru temm billi tenna l-impenn ta' Malta sabiex tkompli tissaħħaħ il-kooperazzjoni mar-Renju Unit fuq kull livell kemm politiku, ekonomiku, kulturali u soċjali, kemm mill-att bilaterali kif ukoll dak multilaterali.

​​