STQARRIJA MILL-MINISTERU GĦALL-ĠUSTIZZJA U R-RIFORMA TAS-SETTUR TAL-KOSTRUZZJONI Il-Ministeru tal-Ġustizzja u l-Akkademja Ewropea tal-Liġi (ERA) jorganizzaw seminars dwar[...]

Il-Ministeru għall-Ġustizzja u r-Riforma fis-Settur tal-Kostruzzjoni, flimkien mal-Akkademja Ewropea tal-Liġi (ERA), organizza żewġ seminars ta' livell għoli ffukati fuq id-drittijiet proċedurali tat-tfal fl-Ewropa u fuq l-użu responsabbli u trasparenti tal-Intelliġenza Artifiċjali (AI) fis-sistema tal-ġustizzja.

L-ewwel seminar ġab flimkien membri tal-ġudikatura, medjaturi, avukati għat-tfal u professjonisti legali sabiex jiddiskutu standards li qed jinħolqu u prattiċi tajbin fil-qasam tal-ġustizzja adattata għat-tfal. Dan is-seminar jifforma parti mill-programm usa' ta' riformi tal-Ministeru, fosthom ir-ristrutturar li jmiss tal-Qorti tal-Familja, waħda mir-riformi l-aktar sostanzjali f'pajjiżna f'dawn l-aħħar snin.

Il-Ministru għall-Ġustizzja u r-Riforma fis-Settur tal-Kostruzzjoni, Jonathan Attard, tenna li r-riformi ta' Malta qed ipoġġu lit-tfal fiċ-ċentru tal-proċeduri. "It-tfal mhumiex aċċessorji fil-proċeduri. Huma detenturi tad-drittijiet. Jistħoqqilhom protezzjoni, li jinstemgħu u li jingħataw l-appoġġ meħtieġ. Is-salvagwardja tad-drittijiet proċedurali tagħhom mhijiex sempliċiment pass amministrattiv, iżda l-pedament etiku ta' sistema tal-ġustizzja moderna, umana u trasparenti li tirrispondi b'mod ġenwin għall-ħtiġijiet tal-familji," stqarr il-Ministru Attard.

Dr Attard irrefera għar-rwol ta' Malta fuq livell Ewropew u semma l-Konferenza riċenti organizzata f'Malta dwar 'l-Aħjar Interess tat-Tfal' taħt il-Presidenza Maltija tal-Kunsill tal-Ewropa. Huwa sostna li dawn l-inizjattivi juru l-impenn ta' Malta li tfassal politika Ewropea bbażata fuq id-drittijiet tat-tfal, il-parteċipazzjoni u prattiċi bbażata fuq l-evidenza.

Fit-tieni jum is-seminar ffoka fuq l-Intelliġenza Artifiċjali fis-sistema tal-ġustizzja, u eżamina l-opportunitajiet u l-isfidi li joħorġu mit-trasformazzjoni diġitali tas-settur tal-Ġustizzja. Il-programm indirizza l-bażi tal-AI, il-linji gwida tal-UE dwar Intelligenza Artifiċjali responsabbli u ta' fiduċja, kif ukoll applikazzjonijiet prattiċi fil-proċessi tad-dokumenti, il-ġestjoni tal-każijiet, il-protezzjoni tad-data, l-etika u s-superviżjoni umana.

Il-Ministru Attard qal li l-approċċ ta' Malta lejn l-AI huwa msejjes fuq trasparenza, kontabbiltà u rispett għad-drittijiet fundamentali. "L-AI qatt ma tissostitwixxi l-ġudizzju uman, imma tappoġġjah. It-teknoloġija trid tgħinna nwasslu ġustizzja aktar effiċjenti, aktar aċċessibbli u aktar ta' min jafdaha, mingħajr ma qatt nissagrifikaw il-ġustizzja, id-dinjità jew is-saltna tad-dritt. L-innovazzjoni qatt m'għandha tmur lil hinn mill-valuri tagħna."

Il-Ministru għamel referenza għall-investimenti li għaddejjin taħt il-Malta Digital Justice Strategy, fosthom sistemi tal-awdjo mtejba fil-qrati, konnettività diġitali msaħħa, għodod għall-ipproċessar tad-dokumenti u l-introduzzjoni tal-Court Information Management System.

Dr Attard enfasizza wkoll ir-rwol ċentrali tal-iżvilupp professjonali u l-koperazzjoni internazzjonali. "Ebda riforma mhijiex iktar b'saħħitha min-nies li jwettquha. It-taħriġ kontinwu u l-kollaborazzjoni mal-imsieħba Ewropej huma essenzjali biex niżguraw li l-professjonisti tagħna jkollhom l-għodod u l-għarfien meħtieġ f'ambjent li qed jevolvi b'ritmu mgħaġġel," sostna l-Ministru Attard.

Il-Ministru rringrazzja lill-esperti tal-ERA, lill-professjonisti li ħadu sehem u lill-ħaddiema tal-Ministeru għall-ħidma tagħhom matul iż-żewġ avvenimenti. "Kemm jekk qed nitkellmu dwar id-drittijiet tat-tfal jew dwar ir-rwol tat-teknoloġija, l-għan jibqa' l-istess: ġustizzja li tisma' aħjar, tipproteġi aħjar u tiddeċiedi aħjar," temm jgħid il-Ministru Attard.