STQARRIJA MILL-MINISTERU GĦALL-KULTURA, L-ARTIJIET U L-GVERN LOKALI Proprjetà pubblika mogħtija b’titolu ta’ kera lill-Breeds of Origin Conservancy sabiex tintuża bħala sit[...]

Proprjetà pubblika li hija taħt ir-responsabbiltà tal-Awtorità tal-Artijiet ġiet trasferita b'titolu ta' kera għal ħmistax-il sena, lill-għaqda nongovernattiva Breeds of Origin Conservancy sabiex tintuża bħala sit ċentrali għar-riċerka, ir-riġenerazzjoni u l-konservazzjoni ta' patrimonju kulturali intanġibbli marbut ma' bhejjem indiġeni. Il-proprjetà tinsab fi Triq Delimara fil-limiti ta' Marsaxlokk.

Permezz ta' dan it-trasferiment, din l-art f'Delimara, se tgħaqqad ir-riċerka xjentifika, il-prinċipji ta' rewilding u l-protezzjoni tal-wirt kulturali, bil-għan li jiġi żgurat il-protezzjoni u l-ħarsien fit-tul ta' bhejjem indiġeni u varjetajiet Maltin, flimkien mat-tradizzjonijiet marbuta mat-trobbija tal-bhejjem, fosthom il-prattika tar-ragħa, meqjusa bħala wirt intanġibbli.

Fil-qalba tal-proġett hemm ir-rikonoxximent tal-wirt kulturali ħaj ta' pajjiżna, li jinkludi elementi kemm tanġibbli u intanġibbli, fosthom r-raħħal, il-bhejjem indiġeni, b'mod speċjali l-mogħża Maltija.

Il-Ministru Bonnici qal li dan il-proġett huwa pass sinifikanti biex inħarsu dak li jagħmel lil pajjiżna uniku, ir-razzez, it-tradizzjonijiet u aspetti intanġibbli oħra ta' wirt pajjiżna. Huwa spjega li dan it-trasferiment se jgħaqqad ir-riċerka mal-kultura, billi tippreserva mhux biss il-wirt naturali tagħna, iżda wkoll teżori ħajjin li jirrappreżentaw il-ħajja u l-istorja tal-poplu Malti.

Dan il-proġett, qal il-Ministru, jassigura futur fejn il-wirt intanġibbli tagħna jibqa' jgħix, jitgawda u jispira lil oħrajn.

Il-Kap Eżekuttiv tal-Awtorità tal-Artijiet, Robert Vella qal li l-Awtorità tirċievi bosta talbiet ta' natura differenti, iżda din kienet waħda mhux tas-soltu, żona ddedikata għall-konservazzjoni tal-annimali. Huwa saħaq li dan il-proġett huwa ta' sodisfazzjon kbir għall-Awtorità, speċjalment meta tara l-passjoni li turi l-Breeds of Origin Conservancy fix-xogħol li twettaq. Is-Sur Vella awgura wkoll li l-Breeds of Origin Conservancy tkompli b'din l-inizjattiva b'suċċess u b'benefiċċju għall-komunità kollha.

Darryl Grech, fundatur tal-għaqda volontarja Breeds of Origin Conservancy, qal "Jekk ngħarblu l-istorja ta' pajjiżna u nirriflettu ftit x'inhu l-vera Patrimonju Malti li sawwar l-identità tagħna, ir-raħħal, il-mogħża Maltija u t-tradizzjonijiet marbuta maż-żamma tal-bhejjem, fosthom il-prattika tar-ragħa, faċli nintebħu li dawn jidħlu feles bħala wirt kulturali u intanġibbli ħaj ta' pajjiżna. Dawn illum qed jiġu indukrati biex ikomplu jiġu mħarsa."

It-trasferiment ġie ffirmat mill-Kap Eżekuttiv tal-Awtorità tal-Artijiet Robert Vella u Darryl Grech fil-kapaċità tiegħu bħala Fundatur tal-għaqda governattiva.