Ministri Hoxha takohet me Nënsekretaren e Shtetit Allison Hooker: Shqipëri-SHBA avancojnë interesat e përbashkëta

Ministri për Evropën dhe Punët e Jashtme, Ferit Hoxha, u takua me Nënsekretaren e Shtetit për Çështjet Politike, Allison Hooker, në margjinat e Forumit Strategjik të Bledit.

Në vijim të diskutimeve të zhvilluara në Uashington, korrikun e kaluar, Ministri Hoxha dhe Nënsekretarja Hooker riafirmuan rëndësinë e partneritetit strategjik Shqipëri-SHBA dhe angazhimin e përbashkët për thellimin e mëtejshëm të bashkëpunimit dypalësh në fushat me interes të ndërsjellë.

Gjatë takimit u shkëmbyen mendime mbi bashkëpunimin në fushën e mbrojtjes dhe sigurisë, si dhe mbi bashkëpunimin në kuadër të NATO-s, veçanërisht pas Samitit të Ankarasë dhe në prag të Samitit të ardhshëm të Aleancës në Shqipëri.

Ministri Hoxha dhe Nënsekretarja Hooker diskutuan gjithashtu mbi mjedisin e sigurisë dhe zhvillimet e fundit në Ballkanin Perëndimor, duke riafirmuar rëndësinë e angazhimit të vazhdueshëm në mbështetje të stabilitetit dhe sigurisë rajonale.

Shqipëria dhe Shtetet e Bashkuara mbeten të bashkuara nga një partneritet i gjatë, i rrënjosur në vlerat e përbashkëta demokratike, solidaritetin transatlantik dhe angazhimin e përbashkët për sigurinë.

Në përfundim, u shpreh gatishmëria për vijimin e dialogut dhe bashkëpunimit të ngushtë, me fokus në arritjen e rezultateve të prekshme që avancojnë interesat e përbashkëta dhe sjellin përfitime për të dy vendet.