STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU “M’għandna qatt ninsew l-esperjenzi umani wara d-deċiżjonijiet li nieħdu”[...]

​

"Ix-xogħol tagħna fil-Kunsill tal-Ewropa jolqot il-ħajjiet ta' individwi, familji, u nazzjonijiet sħaħ - m'għandna qatt ninsew l-esperjenzi umani wara d-deċiżjonijiet li nieħdu." Il-Ħamis waranofsinhar, id-Deputat Prim Ministru u Ministru għall-Affarijiet Barranin u t-Turiżmu, Ian Borg, ħeġġeġ lill-parlamentari tal-Assemblea Parlamentari tal-Kunsill tal-Ewropa (PACE) biex ikunu "d-dawl b'saħħtu ta' tama u umanità, li jiddi fuq it-triq lejn ġustizzja llum u lejn futur ta' paċi, u dinjituż, għall-ġejjieni."​

Fi Strażburgu, huwa kien qed jindirizza s-Sessjoni tal-Ħarifa tal-Assemblea, fil-kariga tiegħu bħala l-President tal-Kumitat tal-Ministri tal-Kunsill tal-Ewropa, biex jagħti rendikont tax-xogħol tal-Kumitat f'dawn l-aħħar xhur, mill-aħħar darba li indirizzahom fis-Sessjoni tar-Rebbiegħa f'Ġunju, ftit wara li Malta bdiet is-sitt xhur tal-Presidenza ta' din l-organizzazzjoni.

Dr Borg appella għall-għaqda u l-fiduċja fost il-membri tal-Kunsill, hekk kif saħaq li "m'għandniex inħallu d-differenzi jifirduna. Iżda, ejjew minflok nersqu lejn djalogu li jgħinna nimxu 'l quddiem flimkien."

"Il-Presidenza ta' Malta hija msejsa fuq dan il-prinċipju - li r-rilevanza toħroġ minn kemm kapaċi nirreaġixxu, b'ħidmiet mibnija fuq djalogu miftuħ, li nisimgħu lil xulxin, u li nifhmu l-kuntest li fih qed noperaw," żied jgħid.

Id-Deputat Prim Ministru fakkar fil-mument storiku waqt il-Presidenza Maltija f'Ġunju, meta l-President tal-Ukrajna Volodymyr Zelenskyy żar il-Kunsill tal-Ewropa biex jiffirma ftehim bilaterali li stabbilixxa t-Tribunal Speċjali għar-Reat ta' Agressjoni kontra l-Ukrajna. "Dan wera li l-politika tista' twassal għall-ġustizzja, li l-kontabbiltà hija possibbli, u li ħadd mhu 'l fuq mil-liġi," hu tenna.

Dr Borg tkellem ukoll dwar il-kriżi umanitarja f'Gaża, hekk kif il-poplu Palestinjan qed jaffaċċja ġuħ u sfidi oħra. Filwaqt li fakkar fit-tbatija tal-ostaġġi tal-attakki terroristiċi tal-Hamas f'Ottubru 2023, huwa enfasizza li l-liġi internazzjonali titlob moderazzjoni u proporzjonalità minn dawk kollha involuti, "mhux bħala suġġeriment, iżda sabiex tissalvagwardja l-ħajja ta' dawk milqutà."

"Qatt ma nistgħu nieqfu niffukaw fuq it-tbatija li qed jgħaddu minnha t-tfal f'dan il-kunflitt. Eluf ta' tfal innoċenti, li suppost qegħdin jilagħbu u jidħku bla biża', iżda minflok qed iġorru feriti ta' telfien, trawma u ġuħ estrem li ebda tifel jew tifla m'għandhom ibatu," qal Dr Borg.

Id-diskors tiegħu enfasizza wkoll il-ħtieġa urġenti li jiġu mħarsa l-ġurnalisti f'Gaża. Fakkar li "dawk il-vuċijiet kuraġġużi li jirriskjaw kollox biex iżommuna infurmati u jikxfu l-verità, qed jinqatlu b'rata xokkanti."

B'referenza għall-programm u l-prijoritajiet tal-Presidenza Maltija, Dr Borg semma l-ewwel Konferenza Ministerjali Informali dwar il-Protezzjoni tat-Tfal, li saret f'Lulju fil-Belt Valletta, fejn il-Ministri adottaw b'mod unanimu Dikjarazzjoni Politika biex isaħħu l-kooperazzjoni internazzjonali għall-ħarsien tat-tfal, speċjalment fl-isfond tad-dinja diġitali tal-lum.

F'Settembru, il-Ministri tal-Ġustizzja tal-Kunsill tal-Ewropa ltaqgħu wkoll f'Malta, fejn qablu dwar Dikjarazzjoni Politika li tistabbilixxi pjan għat-tisħiħ tal-istituzzjonijiet, dawk li jaħdmu fihom, u l-isforzi kollaborattivi tagħhom, fis-snin li ġejjin.

Id-Deputat Prim Ministru Malti tkellem ukoll dwar il-Konferenza ta' Livell Għoli dwar it-tisħiħ tar-reżiljenza demokratika kontra d-diżinformazzjoni, li saret f'Malta x-xahar li għadda. "Li jkollna mezzi tal-media liberi, indipendenti u responsabbli hija l-ewwel linja ta' difiża biex tinkixef l-informazzjoni falza, biex dawk fil-poter jinżammu responsabbli, u biex jinfurmaw liċ-ċittadini b'integrità. Irridu ngħinu lin-nies, speċjalment liż-żgħażagħ, bl-għodod biex ikunu jistgħu janalizzaw l-informazzjoni b'mod kritiku u jipparteċipaw b'mod attiv biex insawru kultura demokratika mibnija fuq il-verità u l-kontabbiltà," hu spjega.

B'ħarsa 'l quddiem, Dr Borg semma l-Konferenza tal-Ministri responsabbli għaż-żgħażagħ, li se ssir il-ġimgħa d-dieħla f'Malta. Din se taħdem biex tadotta Qafas ta' Riferiment dwar l-integrazzjoni tal-perspettivi taż-żgħażagħ, li jpoġġi liż-żgħażagħ fiċ-ċentru tad-demokrazija Ewropea.

"Id-demokrazija tiffjorixxi meta ħadd ma jaqa' lura. Progress veru jfisser li n-nisa jingħataw il-post tagħhom fiċ-ċentru tal-ħajja politika, fejn jistgħu jifformaw il-politika bit-tmexxija, l-għarfien u l-qawwa tagħhom. Iż-żgħażagħ ukoll iridu jingħataw il-poter biex jinfluwenzaw id-deċiżjonijiet li se jiffurmaw il-futur tagħhom, għaliex tmexxija inklussiva tibda billi tissaħħaħ kull ġenerazzjoni," żied jgħid.

It-Tlieta filgħaxija, id-Deputat Prim Ministru ngħaqad mal-President ta' Malta, Myriam Spiteri Debono, ir-Rappreżentanta Permanenti ta' Malta għall-Kunsill tal-Ewropa, Francesca Camilleri Vettiger, is-Segretarju Ġenerali tal-Kunsill tal-Ewropa, Alain Berset, u l-President tal-PACE, Theodoros Rousopoulos, fost mistednin distinti oħra, f'attività li tfakkar il-jum nazzjonali ta' Malta. Din is-serata, li ttellgħet mir-Rappreżentanza Permanenti ta' Malta għall-Kunsill tal-Ewropa bħala parti mill-programm kulturali tal-Presidenza ta' Malta, ippreżentat ċelebrazzjoni tat-tradizzjonijiet kulturali mill-isbaħ tal-festi Maltin.

​