O Concello súmase á “Cumbre pola Paz” organizada polo colexio Grande Obra de Atocha

A cita incluíu música, mensaxes e a lectura dun manifesto por parte do alumnado, nun ambiente participativo e emotivo que reafirma o papel da educación como motor de transformación social.

O Concello da Coruña participou esta mañá na "Cumbre pola Paz" organizada polo colexio Grande Obra de Atocha, un acto educativo e simbólico no que máis de mil persoas, entre alumnado e profesorado, se reuniron para reivindicar o valor da paz, o respecto mutuo e a solidariedade como piares dunha sociedade mellor.

O evento, que tivo lugar no pavillón do centro, contou coa participación da alcaldesa, Inés Rey, e do concelleiro de Educación, Juan Ignacio Borrego, que estiveron acompañados pola directora do colexio, María Teresa Iglesias, e o director de primaria, Ricardo Rey.

Durante a súa intervención, a rexedora destacou que "a paz non é só a ausencia de violencia, senón un camiño que se constrúe cada día con pequenos xestos de xustiza, empatía e coidado mutuo".

A cita incluíu música, mensaxes e a lectura dun manifesto por parte do alumnado, nun ambiente participativo e emotivo que reafirma o papel da educación como motor de transformación social.

Coa súa participación neste acto, o Goberno de Inés Rey renova o seu compromiso coa educación en valores, a convivencia e a promoción dunha cultura de paz desde a infancia.